وأول مرة أروح و أهتم
ببنت جديدة في تجارة
وأول مرة أنزف دم
في ماتش لعبته في الحارة
وأول مرة أروح
مصيف بدون عيلتي
وأول فسحة ويا بسنت
بأخر مية جنيه حيلتي
وأول قعدة عالقهوة
في ضهر الجامعة مع إسلام
وأول مألمة أقلام
وأول مرة أروح أفلام
أنا و الشلة في السيما
وأول مرة أقول خلاويص
يرد أصحابي ﻻ لسه
وأول كتة م الحصة
وأول مرة أشيل مادة
و أول مرة بالدبلة
بنخرج برة نتغدي
وأول رنة في التليفون
وأول تبس للجرسون
قصادها عشان أكون جنتل
وأول تاكس توصيلة
و قبل البيت تقوم تنزل
وأول شلة ع الدكة
و أول مرة أكون شايل
في جيبي فلوس غير الفكة ..
و أول كل شئ سيبته عشان السن
وأول دعوة من واحد غريب و مسن
وأول مرة أخاف م الجن
وأول كل إحساس عشته في طفولتي
واول مرة احس بسني ورجولتي
وإني كبرت ع الخفة اللي في الحارة
واول شدة لسجارة
وأول مرة احس بأني شاب عجوز
وأول غنوة أحفظها بصوت فيروز
وأول مرة قلبي يحب
وأول مرة م الخنقة اللي فيها أسب
وأول مرة اشيل مفتاح لباب البيت
ﻻول مرة أحس بأني كنت عبيط
عشان كان منتهي حلمي
اني يوم أكبر
و أبطل فرجة ع الكرتون
و أبطل أعمل الواجب
و انام بالغصب و الشخطة
وابطل ارتب الشنطة
علي الجدول و ع الحصة
ﻻول تذكرة مترو
ركبتو لوحدي ف اعدادي
ﻻول مرة كان عادي
حاجات كانت وجودها مهم
شوقها يقل ..
ﻷول مرة تتحول حياتي ً
لشئ قديم و ممل ..
ليست هناك تعليقات:
إرسال تعليق