صباح الخير ..
و كالعادة ..
بحبك ..
كلمة وإتقالت ..
قديمة عقيمة متعادة ..
..
صباح الخير ..
غريب صوتك ..
و هادي لـ درجة طفولية ..
كأني بحب بنوتة ..
كلامها أتخلق ليا ..
وصوتها بَكر بطبيعته ..
كمانجا و ناي فـ مزيكته ..
لـ عازف قلبه لسه مازال ..
بيكتب نوتة لـ حبيبته ..
صباح الخير ..
لـ رعشة صوتك الملموم
فـ أحضاني أنا مـ البرد ..
لـ شمس الدنيا لما تقوم ..
علي همسك فـ ودن الورد ..
صباح الخير علي حسنك ..
صباح الخير علي حزنك ..
صباح الخير علي فرحك ..
صباح الخير علي جرحك ..
صباح الخير ولما أزعل ..
ويحصل برضو أنا مسامحك ..
صباح الخير لأحضانك ..
لفقدانك ولرجوعك و لدموعك
ولوجودك ولغيابك لمكياجك ..
لـ فستانك لـ برفانك ..
لكل ما فيكي من قوة ..
لكل ما فيكي من رقة ..
لكل ما فيكي من طيبة و من حواديت ..
صباح الخير ..
ومـ الأخر .. خلاص حبيت ..
...... التالي صباح الخير2 ......
ليست هناك تعليقات:
إرسال تعليق